كراسة الواجب ...(قصة قصيرة)

- أخدت الساندوتشات يا أيمن ؟
- مش عايز ساندوتشات يا ماما ..
- ياواد انت كل يوم حتغلبني ؟ .. حط الساندوتشات في الشنطة .. واشرب كباية اللبن اللي ع الترابيزة ..

- يالا يا أيمن علشان اوصلك المدرسة .ماتأخرنيش عن الشغل ..
- حاضر يا بابا ...

ايمن يمشي بجوار أبوه الذي يحمل شنطة الكتب بدلا منه فجسده الضعيف لا يقوي علي ثقلها . المسافة ليست بعيدة يقتربان من بوابة المدرسة . يعلق الأب الشنطة علي ظهر أيمن ثم يخرج نصف جنيه من جيبه ويعطيه له ..

- يابابا .. كيس الشيبس ب 75 قرش ..
- مش لازم شيبسي يا أيمن هاتلك بونبوني ياحبيبي ..

يبكي ايمن غضبا ويدخل الي المدرسة , ويواصل الأب طريقه الي عمله متحسرا ..

تبدوا الأمور عادية حتي في طابور المدرسة في الفناء الضيق .. وقف مدرس الألعاب يصيح بصوت جهوري يملأه الملل يالا ياد انت وهو كل حمار يقف في مكانه . اذاعة ...

يقترب طفل من الميكروفون ويقول ..قال رسول الله صلي الله عليه وسلم .. خيركم من تعلم العلم وعلمه .. صدق رسول الله صلي الله عليه وسلم .. النشيد الوطني .يردد الأطفال النشيد بدون أي حماس ...ثم.. السلام الوطني ..تحيا جمهورية مصر العربية ..يهتف الأطفال بشدة فقد اعتادوا علي ذلك ...فهو مؤشر لنهاية عذاب الطابور... تحيا جمهورية مصر العربية ..
مدرس الألعاب : معتادا مارش ..

ينطلق الأطفال إلي الفصول ليكتظوا بها منهم الجالس علي جزء من مقعد ومنهم الجالس علي الأرض ومنهم الواقفون بجوار الحائط ..
ما زالت الأمور عادية ..

يدخل أيمن فصله الذي تتوسطه صورة رثة للرئيس .دخوله متأخرا معناه انه سيكون في زمرة الواقفين بجوار الحائط ..

الحصة الأولي لغة عربية والمدرس الأستاذ قاسم ..كوتشي وبنطلون جينز وقميص أبيض(سابقا) ضاعت معظم زرايره أكمامه مدلدلة .. يمسك في يده اليمني دفتر التحضير وفي اليسري الخرزانة ..

صوته يخرج بالعافية ..
- عملتوا الواجب ؟ ..
- ايوة يا أستاذ ..
- اللي ماعملش الواجب يرفع ايده ..
- اطلعولي بره هنا ويشير الي مدخل الفصل ..

- طلعوا كراسة الواجب ..

ينحني ايمن باحثا عن الكراسة في شنطته المزدحمة .. لا يجده ..يجلس علي الأرض ويتابع البحث جيدا ..لا يجده .. يحدث نفسه ..راح فين؟ انا والله عملت الواجب امبارح وماما ساعدتني فيه لأني مابفهمش حاجة من الأستاذ قاسم .. فين الكراسة ؟ يمتليء رعبا لازال يبحث .. يراه الأستاذ قاسم ..

- فين الواجب ياد انت ..؟
- والله عملته يا أستاذ بس مش لاقي الكراسة
- انت حتستهبل ياروح امك .؟ عاملي فيها برم .....مارفعتش ايدك من الأول ليه ..؟
- والله عملته يا أستاذ حتي اسأل ماما ..

- ماما ايه يابن الكلب ياجزمة ؟

يوجه شلوته الأول فيتفاداه أيمن فيختل توازن الأستاذ ويستعيده بصعوبة بعد ان كان علي وشك السقوط ..يستشيط غضبا .. يتقدم نحو أيمن والغيظ يملأه .. يرقعه الشلوت التاني ..المرة دي الشلوت لبس في جنب ايمن فينحني ألما فيعاجله الأستاذ قاسم بالشلوت الثالث في بطنه ..

يسقط ايمن علي الأرض تحت صورة الرئيس حسني مبارك .. ينظر له الأستاذ قاسم شذرا ويأمر من حوله :
- وقفوه ..
ويستدير منتصرا عائدا إلي مقدمة الفصل ...

أستاذ يا أستاذ... يا أستاذ ...الواد أيمن قطع النفس ومابيتحركش ....